Leerlingraad 2026

My laerskooljare by Laerskool Vryheidsmonument het baie vinniger verbygegaan as wat ek ooit kon dink. Dit voel soos gister toe ek as ’n klein, onseker Graad 3-leerder met groot drome by die hek ingestap het. Vandag staan ek met ’n dankbare hart en groot nederigheid as Hoofdogter vir 2026. Ek wil eerstens al die eer aan my Hemelse Vader gee. Sonder Sy genade, leiding en krag sou hierdie voorreg nie moontlik gewees het nie. Dit is vir my ’n groot eer om ’n leier én ’n dienaar van ons pragtige skool te wees. Laerskool Vryheidsmonument is soveel meer as net ’n skool – dit is ’n plek van groei, veiligheid, waardes en herinneringe. Ons onderwysers is ware rolmodelle wat nie net kennis oordra nie, maar ook harte vorm. Dankie aan elke Monnie-onderwyser vir julle opoffering, liefde en volgehoue geloof in elke leerder. My gebed vir 2026 is dat die Here ons skool sal beskerm en seën, dat Hy elke leerder, onderwyser en ouer sal dra, en dat ons as Monnie-familie altyd ons oë op Hom gerig sal hou. Mag ons met wysheid lei, met liefde optree en met nederigheid dien. ’n Warm welkom aan al ons Graad 1-leerders en nuwe Monnie’s. Julle is nou deel van ’n spesiale familie – wees dapper, wees vriendelik en geniet elke oomblik. Aan my mede-leerders: gee hierdie jaar jul beste in alles wat julle aanpak – akademie, sport en kultuur. Onthou dat elke uitdaging ’n kans is om sterker te word en te groei. En aan die Graad 7’s van 2026 – kom ons maak hierdie laaste jaar by Vryheidsmonument een wat onthou sal word, gevul met trots, respek en Monnie-gees! Kom ons leef ons leuse “Vorentoe” elke dag uit – met geloof in God, hoop in ons harte en hande wat mekaar ondersteun. Hou vas aan Spreuke 3:5–6: “Vertrou op die Here met jou hele hart en steun nie op jou eie insig nie. Ken Hom in al jou weë, dan sal Hý jou paaie gelykmaak.” Dankie vir die vertroue wat in my en die leierspan gestel word. Ek sien uit na ’n geseënde, betekenisvolle en onvergeetlike 2026 saam met elke Monnie. Vriendelike groete Izel Roelofs